රත්රං මිල තවත් පහළට
මෙරට රත්රං මිල ඊයේ (28) දිනට සාපේක්ෂව රුපියල් 2000කින් පහළ ගොස් ඇති බව වෙළෙඳපොළ දත්ත පෙන්නුම් කරයි. ඒ අනුව අද (29) පෙරවරුවේ කොළඹ හෙට්ටිවීදිය රන් වෙළෙඳපොළෙහි “කැරට් 22” රන් පවුමක මිල රු. 294,000ක් දක්වා පහළ ගොස් ඇති බව වාර්තා වේ. ඊයේ දිනයේ දී එය දැක්වුණේ රු. 296,000ක් ලෙසයි.
රජය සරසවිවල අංශාධිපතිවරුන් පීඨාධිපතිවරුන් පත් කරන්න හදන්නේ යෞවන සමාජවලට පැලවත්තෙන් නම් ලිස්ට් එක යැව්වා වගේ – විපක්ෂ නායක සජිත් ප්රේමදාස මහතා
විශ්වවිද්යාල ක්ෂේත්රයේ දැවැන්ත පරිවර්තනයක් සිදු කරනවා කියා අද ක්රියාත්මක කරන අනපනත් එදා ජනතාවට පොරොන්දු වූ ක්රමයේ වෙනස ද කියා ප්රශ්න කරන බවත් මේ නව අනපනත් හරහා පීඨාධිපතිවරුන් හා අංශාධිපතිවරුන් පත් කරන ක්රමවේදය 49 සහ 51 වැනි වගන්තිය තුළින් පෙන්වා දෙන නමුත් උපකුලපතිවරුන් පත් කිරීම සහ විශ්වවිද්යාල ප්රතිපාදන කොමිසමේ සභාපතිවරයා සහ කොමිසමේ සාමාජිකයන් පත් කිරීම සහ කවුන්සිල් සාමාජිකයන් මෙන්ම අධ්යයක්ෂවරුන් පත් කිරීම ගැන සඳහන් නොමැති බවත් මේවාට බලපෑම් නොකර අංශාධිපතිවරුන් සහ පීඨාධිපතිවරුන් පත් කිරීමේ ක්රමවේදය තුළ සිදු කරන්නේ ප්රජාතන්ත්රවාදය ක්රියාත්මක කරනවා වෙනුවට ප්රජාතන්ත්රවාදය හකුලා ගැනීමට රජය කටයුතු කරන බවත් විපක්ෂ නායක සජිත් ප්රේමදාස මහතා අද පාර්ලිමේන්තුවේදී පැවසීය. විපක්ෂ නායක සජිත් ප්රේමදාස මහතා මේ බව කියා සිටියේ අද පාර්ලිමේන්තුවේදී විශ්වවිද්යාල පනත සම්බන්ධයෙන් අදහස් පල කරමිනි. university governance autonomic accountability directions of change වාර්තාවේ එක් කර්තෘවරියක් වන්නේ වත්මන් අගමැතිවරිය බවත් මේ වාර්තාවට අනුව හරිනි අමරසූරිය අගමැතිතුමිය එවකට FUTA එකේ අධ්යාපනයට 6%ක් වෙන් කිරීමේ ව්යාපාරයේ පුරෝගාමියා ලෙස උපකුලපතිවරයා පත් කිරීමේ සිට සියලු දේම නිර්දේශපාලනීකරණය විය යුතු යැයි එදා පැවසුවත් අද ඇයම උසස් අධ්යාපන අමාත්යවරිය ලෙස මේ දේ අද ක්රියාත්මක නොකරන බවත් 2015 හරිනි අමරසූරිය මහත්මිය උපකුලපතිවරයා පත් කිරීම ඇතුළු සෑම දේ නිර්දේශපාලනීකරණය මෙන්ම කුසලතාව මත සිදුවිය යුතු යැයි කිව්වත් 2026 වන විට අගමැතිවරිය සහ උසස් අධ්යාපන අමාත්යවරිය ලෙස වෙනස් කර අමුතු ක්රමයේ වෙනසක් ඇති කර ඇති බවත් විපක්ෂ නායකවරයා පැවසීය. එදා ප්රජාතන්තවාදය ගැන කතා කළ හරිනි අගමැතිතුමිය අද විශ්වවිද්යාල පද්ධතියට ඒකාධිපතිවාදය ගේනවා මේ හරහා විශ්වවිද්යාල පද්ධතියේ ස්වාධිනත්වය නිදහස සම්පූර්ණයෙන්ම අවහිර කර ඇති බවත් විශ්වවිද්යාලවල මහාචාර්ය අයිවර් ජෙනිස් ඇතුළු පොදුරාජ්ය මණ්ඩල සංකල්ප අමු අමුවේ උල්ලංඝනය කර ඇති බවත් කවුරු මොන කතා කිව්වත් එදා ප්රජාතන්ත්රවාදය ගැන කතා කළ හරිනි අමරසූරිය මහත්මිය අද විශ්වවිද්යාල පද්ධතියේ ඒ්කාධිපතිවාදය ඇති කරන්න කටයුතු කරන්නේ කොහොමද කියා පහදන ලෙසත් විපක්ෂ නායකවරයා පැවසීය. විශ්වවිද්යාල පද්ධතියේ අඩුපාඩු රැසක් තිබෙනවා අද වන විට විශ්වවිද්යාල පද්ධතියට හරියට අරමුදල් ලබා නොදෙන බවත් සෑම විශ්වවිද්යාලයකම Academic මෙන්ම Non Academic පුරප්පාඩු රැසක් ඇති බවත් බුද්ධි ගලනයට කිසිදු වැඩපිළිවෙළක් නොමැති බවත් බරපතල ලෙස ඩිජිටල්කරණය ඇනහිට ඇති බවත් ආයතනික නිදහස ආයතනයේ ස්වාධිනත්වය විනාශ වී ඇති බවත් සිසුන්ට අවශ්ය නේවාසික සම්පත් භෞතික සම්පත් නැති මොහොතක මෙවැනි යෝජනා ඉදිරිපත් කර ඇති බවත් විපක්ෂ නායකවරයා වැඩිදුරටත් පෙන්වා දුන්නේය. අද UGC සභාපතිවරයා ආණ්ඩුක්රම ව්යවස්ථාවත් උල්ලංඝනය කරලා UGC එක කොයි තරම් ඒකාධිපති ලෙස ක්රියාත්මක වන්නේ ද කියා කියනවා නම් 2026 මේ පනත අනුමත වෙන්නට පෙර UGC සභාපතිවරයා විසින් උපකුලපතිවරුන්ට පවතින නිතිය තුළ පත් කිරීම් නවත්වන ලෙස නියෝග කරන බවත් අලුත් නීතිය යටතේ ක්රියාත්මක වන ලෙසත් රටේ පවතින නීතිය ක්රියාත්මක නොකරන ලෙස ලිඛිතව දැනුම් දී ඇති බවත් මෙය රටේ නීතියට සහ ආණ්ඩුක්රම ව්යවස්ථාවට සිදු කරන ලද අපහාසයක් මෙන්ම අනීතික නීතියක් බවත් මෙය රටේ අණපනත් හෑල්ලුවට ලක් කිරීමක් බවත් විපක්ෂ නායකවරයා පැවසීය. මේක තනිකර ඒකාධිපතිවාදය ස්ථාපිත කිරීමක් මේකත් හරියට සිවිල් ආරක්ෂක ක්ෂේත්රයේ කමිටුවලට යෞවන සමාජවල සාමාජිකයන් යවන්න පැලවත්තෙන් නම් ලැයිස්තු යැව්වා සේ විශ්වවිද්යාලවල ද පත් කිරීම් කරන්නට උත්සාහ කරන ඒකාධිපතිවාදයක් ක්රියාත්මක වන බවත් විපක්ෂ නායක සජිත් ප්රේමදාස මහතා වැඩිදුරටත් පැවසීය.
ඩඩ්ලිගේ කාර් එකට රුපියල් බිලියනයක බාල්දියක්
ප්රසිද්ධ ව්යාපාරිකයෙකු වන ඩඩ්ලි සිරිසේන මහතා විසින් මෑතකදී ආනයනය කරන ලද මෝටර් රථය Rolls Royce Phantom Auto මෝටර් රථයක් බවට වැරදි ලෙස ප්රකාශයට පත් කර ආනයනය කර ඇති බව රේගු නිලධාරීන් සොයා ගැනීමෙන් පසු ශ්රී ලංකා රේගුව රුපියල් මිලියන 70 ක පමණ දඩයක් ආනයනකරුට නියම කර ඇති බව Economy Next වෙබ් අඩවිය වාර්තා කරනවා. ඔවුන් පවසන්නේ රේගු මූලාශ්ර දෙකකින් සිදුකළ සොයා බැලීමකින් අනතුරුව වාර්තා වී ඇත්තේ මෙම රථයේ ආනයනකරු එක්සත් රාජධානියේ 20% ක බද්දක් ඇතුලුව මෙම වාහනය ස්ටර්ලින් පවුම් 417,000 ක වටිනාකමකින් යුක්ත බවට ප්රකාශ කර ඇති බවයි. “ආනයනකරු පවසන එම මුදල Rolls Royce Phantom Auto මෝටර් රථයක් සඳහා නිවැරදි වුවත්, ඩඩ්ලි සිරිසේන මහතාට ආනයනය කර ඇති මෝටර් රථයේ දිග සහ රෝද ප්රමාණය Rolls Royce Phantom Auto මාදිලියට වඩා විශාල වූ බව රේගු නිලධාරියෙක් Economy Next වෙත පවසා තිබෙනවා. එනම් ඩඩ්ලි සිරිසේන මහතාට ආනයනය කර ඇත්තේ Rolls Royce Phantom 8 Series 2 EWB 2025 මාදිලියේ වාහනයක් වන අතර එවැනි වාහනයක වටිනාකම එක්සත් රාජධානියේ 20% ක බද්දක් ඇතුළුව ස්ටර්ලින් පවුම් 479,000 ක් පමණ වන බවයි රේගු ආරංචි මාර්ග පවසන්නේ. මෙම වැරදි තොරතුර හේතුවෙන් ඩඩ්ලි සිරිසේන මහතාට රෝල්ස් රොයිස් වාහනය ආනයනය කරන ලද ආනයනකරුට රුපියල් මිලියන 70 ක දඩයක් ඇතුළුව මුළු මුදල රුපියල් මිලියන 370 ක් ගෙවීමට නියම කර ඇතැයි EconomyNext වාර්තා කරනවා. රෝල්ස් රොයිස් සන්නාමයේ 100 වන සංවත්සරය වෙනුවෙන් එම ආයතනය නිෂ්පාදනය කරන ලද සීමිත රෝල්ස් රොයිස් මාදිලියෙන් ලොව පුරා ඇති වාහන 25 න් එකක් තමන් සතුව පවතින බවට ඩඩ්ලි සිරිසේන මහතා සිය සමාජ මාධ්යවල පලකිරීමෙන් අනතුරුව එය රෝල්ස් රොයිස් වාහන පිළිබදව උනන්දුවක් ඇති අය හා ව්යාපාරිකයන් අතර දැඩි කතාබහකට ලක්වූ මාතෘකාවක් බවට පත්වූවා. එහිදී ඇතැම් සමාජ මාධ්ය සටහන්හී සදහන් වූයේ මෙම රථය Rolls Royce Phantom ‘සෙන්ටනරි’ මාදිලියෙන් ආනයනය කර ඇති බවයි. කෙසේ වෙතත්, Economy Next පවසන්නේ රේගු නිලධාරීන් පවසන අන්දමට ඩඩ්ලි සිරිසේන මහතා පවසන අන්දමට මෙම රථය රෝල්ස් රොයිස් ෆැන්ටම් සියවස් ආකෘතියක් බව සොයා ගතහොත්, එම රථයට අදාළ බද්ද පමණක් රුපියල් බිලියන 1 ඉක්මවන බවයි.
ජොන්ස්ටන් ඇතුළු පිරිස යළි රිමාන්ඩ්
අත්අඩංගුවට ගෙන රක්ෂිත බන්ධනාගාර ගත කර සිටි හිටපු අමාත්ය ජොන්ස්ටන් ප්රනාන්දු මහතා ඇතුළු සැකකරුවන් 5 දෙනෙකු යළි රක්ෂිත බන්ධනාගාර ගත කිරීමට අධිකරණය නියෝග කර තිබෙනවා. ඒ එම සැකකරුවන්ට එරෙහිව පැවැති නඩුව අද (23) කැඳවූ අවස්ථාවේදීයි. ඒ අනුව එම සැකකරුවන් එළැඹෙන 30 වැනිදා දක්වා රක්ෂිත බන්ධනාගාර ගත කිරීමට මහේස්ත්රාත්වරයා මෙහිදී නියෝග කළා. ජොන්ස්ටන් ප්රනාන්දු මහතා සමූපකාර සහ අභ්යන්තර වෙළෙඳ කටයුතු අමාත්යවරයා ලෙස සිටියදී සතොස ආයතනයේ ලොරි රථයක් අවභාවිත කිරීමේ සිද්ධියට අදාළව ගොනු කෙරෙනු නඩුවක් මත පසුගිය 05 වැනිදා මූල්ය අපාරාධ විමර්ශන කොට්ඨාසය මගින් අත්අඩංගුවට ගෙන වත්තල අධිකරණයට ඉදිරිපත් කළා. එහිදී වත්තල මහේස්ත්රාත් අධිකරණය නියෝග කළේ සැකකරු ඇතුළු පිරිස රක්ෂිත බන්ධනාගාරගත කිරීමටයි.
චාමර සම්පත්ට එරෙහිව අධිචෝදනා
පාර්ලිමේන්තු මන්ත්රී චාමර සම්පත් දසනායක මහතාට එරෙහිව දූෂණ චෝදනා යටතේ කොළඹ මහාධිකරණය හමුවේ නඩු පවරා ඇති බව අල්ලස් හෝ දූෂණ චෝදනා විමර්ශන කොමිසම අද (23) අධිකරණයට දැනුම් දුන්නා. මෙම නඩුව කොළඹ ප්රධාන මහේස්ත්රාත් අසංග එස්. බෝදරගම මහතා ඉදිරියේ අද කැඳවනු ලැබූ අතර, එහිදී අල්ලස් කොමිසමේ නිලධාරීන් කරුණු දක්වමින් කියා සිටියේ සැකකරුට එරෙහිව මහාධිකරණයේ අධිචෝදනා ඉදිරිපත් කර ඇති බවයි. ඒ අනුව මහේස්ත්රාත් අධිකරණය හමුවේ පැවති නඩු කටයුත්ත අවසන් කිරීමට ප්රධාන මහේස්ත්රාත්වරයා පියවර ගනු ලැබුවා. මහේස්ත්රාත්වරයා නියෝග කළේ, මහාධිකරණය මගින් නොතීසි නිකුත් කළ පසුව මන්ත්රීවරයාට එහි පෙනී සිටින ලෙසයි. චාමර සම්පත් මහතාට එරෙහිව මෙලෙස අධිචෝදනා ගොනු කර ඇත්තේ ඔහුගේ අමාත්ය ධුර කාලසීමාව තුළ සිදු වූ බව කියන දූෂණ සිදුවීමකට අදාළවයි.
රමේෂ් පතිරණ පොහොට්ටුවට: අළුත් තනතුරු දෙකක්
ගාල්ල දිස්ත්රික්කය නියෝජනය කළ හිටපු අමාත්යවරයකු වූ වෛද්ය රමේෂ් පතිරණ ශ්රී ලංකා පොදුජන පෙරමුණේ බෙන්තර ඇල්පිටිය ආසන සංවිධායක ලෙස පත්වී තිබෙනවා. ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ අතින් අද දින (22) පත්වීමේ ලිපිය රමේෂ් පතිරණ විසින් ලබාගත්තා. ඒ නෙළුම් මාවත පිහිටි ශ්රී ලංකා පොදුජන පෙරමුණේ පක්ෂ මූලස්ථානයේදී. තවද රමේෂ් පතිරණ ශ්රී ලංකා පොදුජන පෙරමුණේ සෞඛ්ය වෘත්තිකයින්ගේ සංගමයේ කැඳවුම්කරු ලෙසද පත් කර තිබෙනවා. රමේෂ් පතිරණ පසුගිය ජනාධිපතිවරණයේදී රනිල් වික්රමසිංහ හිටපු ජනාධිපතිවරයාට සහාය පළ කළා. අද දින රමේෂ් පතිරණ සමග ගාල්ල දිස්ත්රික්කයේ පළාත් පාලන ආයතනවල හිටපු සභාපතිවරුන් හා පළාත් පාලන ආයතනවල සභිකයින් පිරිසක්ද මෙසේ ශ්රි ලංකා පොදුජන පෙරමුණ හා එක්වුණා.
තීරණ ගැනීමේදී කාන්තාවන් බැහැර කිරීම අහඹු සිදුවීමක් නොවේ – අගමැති හරිනි
තීරණ ගැනීමේදී කාන්තාවන් බැහැර කිරීම අහඹු සිදුවීමක් නොවේ, එය ස්ත්රී පුරුෂ සමාජභාවය අනුව ගොඩනගා ගත් බල ධූරාවලියක ප්රතිඵලයක් බව අග්රාමාත්ය හරිනි අමරසූරිය පවසයි. ඇය මේ බව පැවසුවේ ස්විට්සර්ලන්තයේ Davos-Klosters හි පැවැත්වෙන ලෝක ආර්ථික සංසදයේ 56 වන වාර්ෂික රැස්වීමට සමගාමීව ලෝක කාන්තා මන්දිරයේදී පැවැත්වූ World Woman Davos Agenda 2026 සඳහා ඊයේ (21) සහභාගී වූ අවස්ථාවේදීය. එහිදී “වෙනස්වන ලෝකයට නායකත්වය දෙන කාන්තාවන් (Women Leading the Changing Global Order)” යන තේමාව යටතේ අග්රාමාත්යවරිය සිය දේශනය සිදුකර තිබුණි. වැඩිදුරටත් අදහස් දක්වමින් ඇය පවසා ඇත්තේ කාන්තාවන්ට විශ්වාසයෙන් යුතුව නායකත්වය ලබා දිය හැකි පරිසරයන් නිර්මාණය කිරීමට නම් ආයතනික සහ බලය බෙදී යන ව්යුහයන්හි පරිවර්තනයක් සිදු කළ යුතු බවය. අග්රාමාත්යවරිය, ලොව පුරා කාන්තාවන් දේශපාලන, ආර්ථික සහ සමාජ ක්ෂේත්රයන් නියෝජනය කරමින් සිටින නමුත්, කාන්තාවන් වැටුප් නොලබමින් සිදු කරන රැකබලා ගැනීමේ කටයුතු, අවිධිමත් ශ්රම දායකත්වය සහ කෘෂිකර්මාන්ත ක්ෂේත්රය තුළ ඔවුන් ලබා දෙන දායකත්වයන් තවමත් සමාජය හඳුනා ගෙන නොමැති බව එහිදී පවසා සිටියා ය. තවදුරටත් අදහස් දැක්වූ අග්රාමාත්යවරිය, “දේශපාලන දෘෂ්ටි කෝණයෙන් බලන විට, තීරණ ගැනීමේදී කාන්තාවන් බැහැර කිරීම අහඹු සිදුවීමක් නොවේ; එය කලක් තිස්සේ පවත්වා ගෙන යන ස්ත්රී පුරුෂ සමාජභාවය මත ගොඩනගා ගත් බල ධූරාවලියක ප්රතිඵලයක්. නායකත්වය ලබා දෙන කාන්තාවන්ට, විශේෂයෙන් දේශපාලන ක්ෂේත්රයේ නියැලී සිටින කාන්තාවන්, හිරිහැර, අපහාස සහ ආන්තිකකරණය නිසා එල්ල වන ප්රහාර නිසා බොහෝ විට නායකත්වයෙන් ඉවත් වීමට හෝ ඉන් වැළකී සිටීමට කටයුතු කරනවා. මෙම බාධකවලින් කාන්තාවන් ආරක්ෂා කිරීම කියන්නේ හුදෙක් ආරක්ෂාව පිළිබද දෙයක් නොවේ. එය, කාන්තාවන්ට සිය ස්වාධීනත්වය, අධිකාරිය සහ විශ්වාසය සමඟ නායකත්වය ක්රියාත්මක කළ හැකි පරිසරයන් නිර්මාණය කිරීමේදී ආයතනික සහ බල ව්යුහයන්හි පරිවර්තනයක් කිරීම හරහා සිදු විය යුතු දෙයක්. දේශපාලන කැපවීම එහි ජනතාවගේ ඔරොත්තු දීමේ හැකියාව සමඟ සමපාත වූ විට කළ හැකි දේ ශ්රී ලංකාව පෙන්නුම් කරලා තිබෙනවා. එයට හොඳම නිදසුන ලෙස පළමු වරට, කාන්තාවන් 20 දෙනෙකු පාර්ලිමේන්තුවට තේරී පත් වීමෙන් අපගේ වත්මන් රජය යටතේ දේශපාලන නියෝජනයේ ඓතිහාසික ප්රගතියක් ලබලා තිබෙනවා. එයින් පිළිබිඹු වන්නේ ඒ දැක්ම ඉදිරි දර්ශනයකට පමණක් සීමා වී නොමැති බවයි. සියල්ල ඇතුළත් පාලනයක් කරා නව රජයේ කැපවීම එයින් පිළිබිඹු වෙනවා.” නායකත්වය යනු පවතින අසුන්වලට සීමා වීම පමණක් නොව, පවත්නා පද්ධතින් ප්රතිව්යුහගත කිරීම බව අග්රාමාත්යවරිය සඳහන් කළා ය. ස්ත්රීවාදී, අන්තර් නායකත්වය සඳහා ශ්රී ලංකාවේ කැපවීම අග්රාමාත්යවරිය නැවත තහවුරු කළ අතර, කාන්තාවන් සහ ආන්තිකකරණයට ලක් වූ ප්රජාවන් සහභාගිවන්නන් පමණක් නොවන බවත්, අනාගත ලෝකය හැඩගස්වන ප්රතිපත්තිවල ප්රධාන නිර්මාණකරුවන් බව පවසා සිටියා ය.
කළු කෝට්, ජාතික ඇඳුම, සිවුර අපිට අදාළම නෑ
දේශපාලන ප්රහාර එල්ල කරන ඕනෑම අයකුට “කුඩු වෙලා යන්න” ප්රතිප්රහාර දීමට තමන් පසුබට නොවන බව කේ.ඩී. ලාල්කාන්ත මහතා පවසනවා. ආණ්ඩුවට එල්ල වන විවේචන හමුවේ නිහඬව සිටීම පිළිබඳව පාක්ෂිකයින් නගන චෝදනාවලට පිළිතුරු දෙමින් අමාත්ය ලාල්කාන්ත මහතා කියා සිටියේ, තමන් සැමවිටම පහර නොදුන්නද පසුව එල්ල කරන ප්රහාරය ප්රතිවාදියා කුඩු වී යන මට්ටමේ දරුණු එකක් වනු ඇති බවයි. යම් පාර්ශවයක් තමන්ට ප්රහාර එල්ල කරන්නේ නම්, ඔවුන්ගේ තරාතිරම හෝ ඇඳුම සලකා බලා නිහඬව නොසිටින බව අමාත්යවරයා මෙහිදී සෘජුවම ප්රකාශ කළා. කළු කෝට් නැතිනම් ජාතික ඇඳුම ඇඳලා සිටිමින් හෝ, සිවුර දාගෙන සිටියද අදාළ නැති බව පෙන්වාදුන් ලාල්කාන්ත අමාත්යවරයා දේශපාලන ප්රහාරයක් දිය යුතුනම් එම ප්රතිප්රහාරය දෙන බව එහිදී කියා සිටියා. එමෙන්ම පාර්ලිමේන්තුවේ 159 ක බලයක් සහ විධායක ජනාධිපති ධුරය අතැතිව තිබියදීත් ආණ්ඩුව විවේචන හමුවේ මෘදු පිළිවෙතක් අනුගමනය කරන බවට හිතවතුන් පවා ප්රශ්න කරන බව අමාත්යවරයා මෙහිදී සඳහන් කළා. සමහර පාර්ශවයන් විවිධාකාර දේ වලින් ආරක්ෂා වීමට උත්සාහ කළද, දේශපාලන ප්රහාර එල්ල කිරීමේදී තමන් අකුලගෙන නොසිටින බවත්, ඕනෑම මොහොතක දරුණුතම ලෙස පෙරළා පහර දීමට සූදානම් බවත් ලාල්කාන්ත මහතා වැඩිදුරටත් පැවසුවා.